Барселона синоќа успеа со пресврт да стигне до победа против Интер во второто коло од Лигата на шампионите. Тој триумф значеше и нов рекорд во елитното натпреварување на УЕФА. Барселона стигна до 33 меча без пораз на свој терен и на тој начин успеа да го надмине рекордот на Реал Мадрид.
Кралскиот клуб имаше 32 средби без пораз на „Сантијаго Бернабеу“ во периодот од 1975 до 1990 година. Сега Барселона е новиот континентален владетел кога се работи за дуели без пораз пред своите навивачи во најсилното клупско натпреварување.
Последен пат Барса на „Камп ноу“ загуби од Баерн Минхен со 0:3, и тоа пред шест години. Од тој пораз досега, Каталонците имаат 30 победи и само три нерешени средби со гол-разлика од 101 даден и само 16 примени голови.
