Реал Мадрид и Барселона по вторпат само за три дена ќе играат фудбал во Мадрид. Сепак, ова не е прославеното Ел Класико, туку дуел на женските екипи на двата гиганти.
Реал и Барселона ќе играат во првиот меч од Лигата на шампионите, а каталонскиот гигант е апсолутен фаворит. Девојките на Барселона доминираат во Шпанија, па во првенството имаат перфектен биланс од 24 победи во 24 меча, додека Реал е на петтата позиција и заостанува дури 28 бодови зад големиот ривал.
Ако се погледнат резултатите во меѓусебните дуели, ќе стане уште појасно зошто Барселона е апсолутен фаворит. Во последниве две и пол години играле седум пати и секогаш победувала Барселона. Вкупната гол-разлика е неверојатна и изнесува 32:3 во корист на Каталонците.
Во вториот денешен меч од женската Лига на шампиони ќе играат Баерн Минхен и Пари Сен Жермен, а тука неизвесноста треба да биде поголема.
