Фудбалерите на Реал Мадрид вчера му одржаа фудбалска лекција на Ливерпул, им го нанесоа најтешкиот пораз на Црвените во Лигата на шампионите на нивниот „Енфилд“, славејќи со 5:2, а огромен удел во триумфот имаше Карим Бензема.
Французинот речиси 60-тина минути беше незабележителен на теренот, а потоа експлодира со два гола, а победата ја посвети на неодамна починатата легенда на Кралевите, Амансио.
„Сакам оваа победа да ја посветам на нашиот неодамна починат почесен претседател Амансио. Ова е победа за него. Почнавме лошо и знаевме дека играчите на Ливерпул носени од нивните навивачи ќе нè притиснат во првите 15-тина минути. Сепак, потоа можевте да го видите вистинскиот Реал Мадрид.
Фудбалот на ова ниво е тежок. Кога губите со 2:0 и знаете колку е важен натпреварот, сакате повеќе. Еден гол може да промени сè и тоа се случи кога Винисиус ја затресе мрежата. Исто така сакам да им се заблагодарам на нашите навивачи, тие беа нашиот 12-ти играч и ќе ни бидат потребни и за реваншот“, рече Бензема.
