Би било вистинска фудбалска бајка за Македонија сценарио што сите кај нас го посакуваат, а тоа е да се продолжи со ренесансата на репрезентативниот фудбал и по настапот на Европското првенство ова лето, да играме и на Светското во Катар, а претходно да бидеме и победници во четвртата група од Сегментот Ц во Лигата на нациите.
За тоа најпрво ќе ни треба подвиг во март, на 24 против Италија во полуфиналниот бараж-дуел во Палермо, а ако победиме, потоа и пет дена подоцна на ново гостување кај Португалија или Турција.
Две големи победи во март нè носат на Мундијалот во Катар, што ќе се игра во ноември и декември идната година, и ако приредиме сензации таму, би можеле да отпатуваме со круната во четвртата група од Сегментот Ц во Лигата на нациите.
Натпреварите со Бугарија, Грузија и Гибралтар, вкупно шест, односно по два со секој ривал, ќе ги играме во јуни и во септември исто така идната година, што значи дека пред почетокот на Светското првенство во Катар веќе ќе се знае и кои се четирите шампиони во четирите групи во Сегментот Ц што би играле за титулата севкупен победник и за пласман во Сегментот Б.
Распоредот на мечевите во Лигата на нациите предвидува да се играат четири меча во јуни 2022 година и два во септември истата година.