Тренерот Марсело Бјелса потроши 2,5 милиони долари свои пари за изградба на хотел кој му го подари на неговиот сакан фудбалски клуб Њуелс олд бојс. Популарниот „Лудак“, кој е тренер на Лидс, каде што игра Езџан Алиоски, постојано предизвикува внимание во јавноста со своите изјави и потези, а сега во Росарио изгради и хотел во тренинг-центарот на клубот Њуелс.
Бјелса за хотелот, кој има пет ката и во кој ќе бидат сместени фудбалерите од првиот тим на Њуелс, даде 2,5 милиони долари, што е повеќе од неговите плати што досега ги има земено за шест месеци престој во Англија.
Хотелот со 12 двокреветни соби за фудбалерите и посебен дел за тренерскиот тим, како и сала за состаноци со поглед кон терените за тренинг, кујна, маса за пинг-понг, скара, лифт не е луксузен, туку целта е играчите да бидат фокусирани на работата и да го сакаат клубот за којшто играат. Бјелса го водеше Њуелс од 1990 до 1992 година.
Целиот хотел е декориран со црвена и црна боја, клупските бои на Њуелс олд бојс, и мебелот е во истите бои, а на ѕидовите има испишани мотивациски фрази, слики и постери со луѓе важни за историјата на клубот, како Габриел Хајнце, Габриел Батистута, Тата Мартино, Макси Родригес и Хорхе Валдано.
