Голден стејт вориорс го победија големиот ривал Лос Анџелес лејкерс со 115:101, а по мечот било бурно во соблекувалната на најтрофејниот клуб во НБА лигата.
Тројцата ветерани во тимот на Лејкерс, Мајкл Бисли, Ленс Стивенсон и Џавал Мекги вербално го нападнале тренерот Лук Волтон, а во еден момент била спречена и физичка пресметка.
За гостите од Лос Анџелес не играше Леброн Џејмс, откако завчера имаше кам-бек по пауза од 17 натпревари. Популарните „езерџии“ имаат биланс од 27 победи и 26 порази, но се надвор од плејоф зоната, па има и незадоволство од работата на тренерот Волтон.
На паркетот незадржлив за тимот од Лос Анџелес беше Клеј Томпсон со 28 поени, а Кевин Дурант постигна 21 поен.
Повикот да игра на Ол-стар мечот очигледно му годи на Никола Јокиќ, кошаркар кој повторно забележа трипл-дабл. Центарот на Денвер постигна 13 поени, имаше и 16 скока и 10 асистенции во победата на неговиот тим со 107:106 против Минесота.
Најмногу поени во ноќта со 12 натпревари постигна Џејмс Харден, 43 во победата на Хјустон со 125:98 против Јута џез, а извонредни партии прикажаа и кошаркарите од Балканот.
Лука Дончиќ со 35 поени го предводеше Далас до победа од 111:98 против Кливленд, Бојан Богдановиќ уфрли 31 поен за триумф на Индијана против Мајами со 95:88, а Никола Вучевиќ беше прв стрелец со 24 поени на мечот меѓу Орландо и Бруклин што го доби домаќинот со 102:89.
Резултати: Детроит – Л.А. Клиперс 101:111, Шарлот – Чикаго 125:118, Орландо – Бруклин 102:89, Вашингтон – Милвоки 115:131, Кливленд – Далас 98:111, Мајами – Индијана 88:95, Голден стејт – Л.А. Лејкерс 115:101, Сан Антонио – Њу Орлеанс 113:108, Минесота – Денвер 106:107, Феникс – Атланта 112:118, Јута – Хјустон 98:125, Сакраменто – Филаделфија 115:108.
