Ракометниот клуб Еурофарм Пелистер, поднесе жалба до Ракометната федерација на Македонија за судењето на мечот против Вардар 1961 кој се одигра во Охрид од финалето од Купот на Македонија.
„Жалбата е поднесена поради една од последните одлуки на судиската двојка Николовски-Металари. Вардар имаше еден гол предност, а во последниот напад на вардарци, Филип Талески имаше шут, кој, според пелистерци, е направен по одлука за пасивен напад на арбитрите со намера да се потроши време.
Еурофарм Пелистер се повикува на правилото број осум на ИХФ, според кое направена е материјална штета и прекршени се новите правила според кои секој потег кој во последните триесет секунди од мечот кој на било каков начин задржува или троши време автоматски значи седмерец и црвен картон за противникот“ – стои во соопштението на битолчани.
Слична ситуација, според пелистерци, постоела на натпреварот меѓу Тиквеш и Е. Пелистер во Кавадарци, на кој исто така судеа Металари и Николовски, кога на десет секунди пред крајот Хосни задржал време во последен напад, потег за кој играчот на „зелените“ добил црвен картон, а Тиквеш добил пенал.
