Македонија оствари историски успех со пласманот на Европското првенство што ќе се игра во 2021 година, а идната година на позицијата селектор на поразената Грузија нема да ја дочека Владимир Вајс.
Словакот на клупата на Грузијците, кои загубија од нас со 0:1 во Тбилиси, објави дека ќе биде селектор уште два меча и потоа ќе си замине.
„Ќе останам уште два меча како селектор на Грузија за да го завршиме циклусот во ова издание на Лигата на нациите и потоа си заминувам. Нема веќе простор за соработка“, изјави Вајс.
Му се случи и многу незгоден момент, да загуби во големото финале од Македонија, во меч што одлучуваше за пласман на ЕП, а потоа по мечот грузиските новинари и фоторепортери му ја бојкотираа прес-конференцијата.
Грузија е во група со Македонија во второто издание на Лигата на нации, во Сегментот Ц и двете селекции повторно се фаворити за пласман во повисок ранг на натпревари. Имаат ист број бодови, по шест, а веќе одиграа двапати меѓу себе во втората група, а и двата меча завршија идентично со резултат 1:1.
Грузија задутре во Батуми ќе ѝ биде домаќин на Ерменија, а потоа во последниот меч повторно на домашен терен ќе игра со Естонија на 18 ноември.
Македонија на 15 ноември ја чека Естонија во Скопје, а потоа за прво место игра против Ерменија во Никозија. Ерменците имаат пет бода, но и тежок распоред бидејќи играат против двете првопласирани селекции до крајот на фазата по групи во Сегментот Ц.
