Фудбалската репрезентација на Узбекистан испиша историја, првпат оваа централноазиска нација ќе учествува на Светско првенство, а претседателот Шавкат Мирзијоев лично им честиташе на играчите и објави посебни награди.
На церемонија во Ташкент, секој член на тимот доби електричен автомобил BYD во вредност од околу 50.000 евра како симбол на признание за историскиот успех и промоција на земјата на светската сцена.
Словенецот Среќко Катанец, кој е поранешен македонски селектор, а беше селектор и на репрезентацијата на Узбекистан до јануари оваа година, кога се повлече откако му беше дијагностициран рак, направи прекрасен гест. Тој не беше заборавен, и за него имаше автомобил, но Катанец ги воодушеви сите со тоа што реши да му го подари електричниот автомобил на својот преведувач, Даврон Ахмедов.
