Борјан Георгиевски е новиот тим-менаџер на сениорската репрезентација на Македонија. Раководниот тим на Македонската кошаркарска федерација и селекторот Марјан Илиевски одлучија Георгиевски да биде дел од стручниот штаб на нашата најдобра селекција во наредниот период.
„Благодарност до раководниот тим на Федерацијата и до селекторот Марјан Илиевски за укажаната доверба и вниманието во желбите да се формира уште посилен стручен штаб во сениорскиот национален тим“, вели Георгиевски.
„Пред нас e период со доста предизвици, лето исполнето со доста обврски, особено оној сегмент кој со себе го носат натпреварите во претквалификациите за пласман на Светскиот куп во 2027 година. Јасно е дека ни претстои сериозна работа и се надевам дека во деновите кои следуваат ќе формираме тим за респект. Нема да биде лесно, но нашата работа, освен максимални услови за функционирање, ќе биде да им дадеме максимална поддршка на репрезентативците со цел да ја вратиме кошарката онаму каде што ѝ е местото“, дополнува новиот тим-менаџер на нашата машка сениорска репрезентација.
Борјан Георгиевски своите први обврски на менаџерската позиција ќе ги има со почетокот на подготовките на сениорската репрезентација на Македонија, која во текот на август ќе учествува во втората фаза од претквалификациите за пласман на Мундобаскетот во 2027 година.
Во ФИБА-прозорецот во август, Македонија ќе се натпреварува со репрезентациите на Романија и на Унгарија за едно од првите две места во рамките од групата Б од претквалификациите за Светскиот шампионат.
