Јусуф Нуркиќ продолжи со блескавите игри во дресот на Јута. Босанскиот репрезентативец одигра одлично во победата против Сан Антонио, меч во кој Јута победи со 126:109, а Нуркиќ прокнижи уште еден трипл-дабл.
Босанскиот ѕвер постигна 17 поени, 14 асистенции и 11 скока и стигна до третиот трипл-дабл во кариерата, а втор во низа.
Лос Анџелес клиперс го доби градското дерби против Лејкерс со 112:104, а еден од подобрите во победничкиот тим беше Хрватот Ивица Зубчиќ. Центарот на Клиперс постигна 18 поени, а имаше и 19 скока. Клиперс уште од стартот поведоа, а на полувреме водеа дури со 17 разлика.
Лука Дончиќ со 32 поени, 11 скока и осум асистенции беше најпрецизен кај Лејкерс, додека Леброн Џејмс постигна 23 поени, но тоа беше премалку за нивниот тим да победи во дербито.
Во останатите мечеви кои се играа ноќеска: Орландо – Кливленд 97:124, Филаделфија – Хјустон 128:122 по продолжение, Вашингтон – Денвер 97:107, Далас – Голден стејт 123:115, Минесота – Чикаго 115:120, Портланд – Мајами 127:110.
