Фламенго и Барселона не успеваат да се договорат за трансфер на големиот бразилски талент Рение Жесус Карвалјо, а Каталонците не сакаат да платат 35 милиони евра, колку што бара првакот на Бразил.
Од Фламенго порачаа дека завршил периодот кога ги продаваа своите талентирани играчи за мали пари и објавија дека Рение, кој има само 17 години, ќе остане во клубот.
„Време е европските клубови да разберат дека веќе не можат да купуваат речиси за џабе. Нека подготват многу пари ако сакаат да ангажираат наши играчи. Во спротивно, и Рение и останатите наши играчи за кои има интерес од клубови во Европа нема да се преселат на Стариот Континент“, објавија од Фламенго.
Првакот на Бразил има доста играчи во ростерот за кои се заинтересирани европските гиганти, а најталентиран е Рение, кој веќе има 13 настапи за актуелниот шампион на Јужна Америка.
Пред еден месец Рение потпиша договор со својот матичен клуб со важност до 2024 година, а откупната клаузула му е 70 милиони евра. Фламенго и Барселона беа на прагот на договор за преселба на 17-годишното момче, но работата се изјалови околу сумата за отштета, што Фламенго ја преполови, но Барса не сака да ја плати.
