Светскиот рекорд на 100 метри на Јусејн Болт би можело да биде загрозен благодарение на развојот на нова „паметна атлетска патека“ која се гради во близина на Кембриџ, Англија.
Болт во 2009 година на Светското првенство во Берлин ја истрча „стотката“ за 9.58 секунди. Рекордот стои 16 години и досега ниту еден спринтер не му се доближил сериозно. Но, англиските експерти сметаат дека тоа наскоро би можело да се промени.
Компанијата „Фелдспар спорт“ развива дигитална атлетска патека чија мрежа сензори во реално време ќе собира податоци и ќе ги испраќа до тренерите и спортистите. Технологијата овозможува прикажување на статистики и информации за гледачите за време на натпреварите и на тркачите им обезбедува повеќе енергија, објаснија експертите по првите тестирања.
Usain Bolt becoming the fastest man alive with his 9.58 100m world record time in 2009. pic.twitter.com/WwB8bpcVQA
— Historic Vids (@historyinmemes) January 30, 2024
Научниците веруваат дека оваа „супер патека“ би можела да му овозможи на спринтер да истрча 100 метри за помалку од девет секунди. Повратната енергија што ја дава на спортистите е за 20 проценти поголема во споредба со денешните елитни патеки.
Алвина Чен, основачка и извршна директорка на компанијата, објасни:
„Гледаме колку се развија патиките, методите за тренинг, исхраната… Но, една работа речиси воопшто не се промени, а тоа е подлогата за трчање. Таа не се менува веќе 60 години, уште од Олимписките игри во Мексико 1968. Веруваме дека создаваме прво големо подобрување во оваа област. Нашата патека, зависно од способноста на спортистот и надворешните услови, ќе биде и до 20% побрза од онаа што ќе се користи на Олимписките игри во Париз. Нашата визија е оваа подлога да стане новиот глобален стандард. Имаме најбрза атлетска патека во светот.“
Проектот го поддржа Дарен Кемпбел, поранешен олимписки шампион во штафета и денешен шеф за спринт и штафетни трки во Британската атлетска федерација.
„Можете да бегате од технологијата и да останете во минатото или да ја прифатите и да напредувате. Влегуваме во ера во која технологијата е клучна за секој спорт. Ако сакаме да ја доближиме атлетиката до луѓето, мора да ги едуцираме и да ги поведеме на ова патување. Со години ја следам Формула 1 и сега ми е јасно дека е полесно да се разбере бидејќи е полна со податоци. Атлетиката е еден од ретките спортови за кој би рекол: ‘А каде е тука технологијата?’ Кога последен пат воведовме некоја технолошка иновација што не се однесува на патиките? Ова е токму она што ѝ треба на атлетиката. Одеднаш, трчањето на 100 метри под девет секунди повеќе не звучи како научна фантастика“, изјави Кемпбел.
Новинарите на британскиот „Телеграф“ ја посетија локацијата каде што се тестира патеката. Во тој момент ја испробуваа Узох Херберт и Калија Дауни, двајца од најперспективните британски атлетичари. Спринтерите Теди Вилсон и Рене Реџис исто така соработуваат со научниците во Кембриџ уште од минатата година.
„Разликата е застрашувачка – ова е револуција“, рече Херберт. „Денеска истрчав и до 50 спринтови и сè уште можам да продолжам. Подлогата е мека и реактивна, веднаш те одбива напред.“
