Манчестер јунајтед официјално го објави новиот договор на својот капитен Бруно Фернандеш. Португалецот се обврза со клубот до 2027 година, а во договорот има и опција за продолжување уште на една година.
Дваесет и деветгодишниот играч пристигна на „Олд Трафорд“ од Спортинг Лисабон во зимата 2020 година и брзо стана клучна фигура за тимот. Со 79 гола и 67 асистенции во 234 натпревари за Црвените ѓаволи, Бруно Фернандеш заслужено ја доби капитенската лента на тимот.
United and @B_Fernandes8: the perfect match ❤️
— Manchester United (@ManUtd) August 14, 2024
Our captain stays until at least 2027! ✍️#MUFC
„Сите знаат колку страст имам кон Манчестер јунајтед. Ја разбирам важноста и одговорноста да се носи овој дрес, како и нивото на посветеност и желба што се бара тука. Веќе имав многу посебни моменти откако сум тука: слушав како ‘Стретфорд Енд’ го пее моето име, постигнав хет-трик против Лидс, го водев тимот во големи европски вечери на ‘Олд Трафорд’ и кренав трофеи на ‘Вембли’. Но, не би го потпишал овој договор ако не верував дека најдоброто допрва доаѓа. Од разговорите со шефовите и со менаџерот, сфатив колку е голема желбата на сите да освојуваат големи трофеи и понатаму. Убеден сум дека иднината ќе биде позитивна и со нетрпение го очекувам патот што е пред нас“, изјави Фернандеш по потпишувањето на договорот.
