Како што беше најавено пред извесен период, контроверзната фондација „Македонија“ испрати и официјална понуда за купување на 51% од акциите на ФК Вардар. Од клубот веднаш следуваше категоричен одговор дека ФК Вардар не е на продажба!
Во продолжение комплетното соопштение на нашиот најтрофеен клуб:
„Ситуацијата е крајно алармантна. До клубот пристигна финансиска понуда од страна на бугарската фондација „Македонија”, којашто сака да го купи нашиот Вардар, а со тоа и да го смени целиот идеолошки наратив врз кој 76 години континуирано се развивал клубот.
Нашиот став е дека воопшто не постои простор за дискусија со луѓе коишто не го признаваат македонскиот идентитет, па затоа одговорот ќе го објавиме вака јавно, нека биде тоа одговор на македонскиот народ, кон нечесната и крајно тенденциозна понуда: ВАРДАР НЕ Е НА ПРОДАЖБА!
На ваквите напади ќе продолжиме да одолеваме само доколку секој од нас ја разбере важноста на купување на членската карта. Секој!
Членската карта е наш одговор и најважно оружје при одбраната на ВАРДАР – народниот клуб, највредното кое го поседува Македонија на спортски план и симболот на нашиот вечен непокор!
Голем е, затоа сакаат да го уништат – голем е, затоа ќе го заштитиме!
Воедно, ги повикуваме сите надлежни институции, особено оние кои подадоа рака. Време е за акција, народот повикува на борба за клубот. Членската карта е обврска за сите. Подадената рака значи одговорност!
Биди на стадионот кога ќе грмне „Море сокол пие”. Нека биде тоа нашиот одговор!“
