Тренерот на Реал Мадрид, Чаби Алонсо, изрази разочарување по ремито 1-1 против Жирона, иако неговиот тим доминираше и создаде голем број шанси за гол. Според Алонсо, главната причина за тоа што тимот освои само еден бод е непрецизноста во завршната фаза.
„Особено во второто полувреме видовме подобрување. Притискавме повеќе, создадовме шанси и имавме можност да го добиеме натпреварот, но ни недостасуваше прецизност. Сепак, сезоната е долга и треба да продолжиме напред“, истакна тренерот на Реал Мадрид.
Тој коментираше и за контроверзната ситуација околу можниот пенал над Родриго.
„Не ја видов лично таа ситуација, но ми рекоа дека ВАР требаше да ја провери поради контактот. Овие моменти се клучни и можат да влијаат на исходот на мечот.“
Алонсо додаде дека тимот покажува желба за подобрување и за пресврт на резултатот.
„Имаше моменти кога бевме постојани, а второто полувреме беше значително подобро од првото. Можевме да направиме пресврт и имавме три-четири чисти шанси за втор гол. Тимот покажа желба да ја надмине негативата.“
„Ми се допадна реакцијата на тимот, не беше доволна за победа, но бевме блиску. Треба да продолжиме со единство, самокритика и желба за победи, особено на гостинските натпревари. В среда не очекува меч против Атлетик Билбао, па ќе видиме како ќе се развива“, заклучи тренерот на Кралскиот клуб.
