Реал Мадрид ги освои трите бода на свој терен во дуелот против Мајорка, победувајќи со 2:1. Ова е трета победа во исто толку кола од новата сезона, па Кралскиот клуб е на чело на табелата, но денеска својот меч од ова коло го игра и најголемиот нивни ривал, Барселона.
Кралскиот клуб губеше со 0:1 во Мадрид, но во само 60-тина секунди направи пресврт. Најпрво Арта Ѓулер погоди за 1:1, а веќе во следната акција гол дадеи и Винисиус јуниор за 2:1, што на крајот се покажа и како конечен резултат.
По дуелот, тренерот на Реал, Чаби Алонсо беше запрашан зошто уште не му дава никаква шанса на Фран Гарсија, фудбалерот кој одигра одлично на Светското клупско првенство летово.
„Фран Гарсија? Зборував со него, исто како што зборував и со Асенсио, Алба и сите оние кои уште немаат играно. На сите им реков иста работа, а тоа е дека ќе дојде нивната шанса да играат. Ќе има период кога ќе треба да играме по три меча во седум дена и тогаш ќе треба минутажата на фудбалерите да биде рамноправно распределена, за да не дојде до повреди кај дел од играчите. Тогаш ќе дојде време и за овие фудбалери да играат“, рече Алонсо.
