Барселона во второто полувреме, по влегувањето во игра на Ансу Фати, го демолира Реал Сосиедад со 4-1, а тренерот Чави по мечот зборуваше и за проблемот што го имаат со Жил Кунде, кој го платија 55 милиони евра и уште не може да заигра од административни причини.
„Ме загрижува и ме вознемирува отсуството на Кунде. Потпишавме договорот со него за да игра. Да не ме разберете погрешно, раководството на клубот работи добро, но сакам Кунде да го имам во тимот, и играчот го разбира проблемот, па ќе видиме неделава што ќе се случи“, изјави Чави.
Според шпанските медиуми, за да може да го пријави Кунде, Барса мора да ослободи најмалку 20 милиони евра за плати. Тоа може да се стори ако се продадат играчите кои се непотребни во тимот (Дест, Умтити, Брајтвајт) и оние кои се барани од други клубови (Обамејанг, Депај).
Кунде има опција на 31-ви август да го раскине договорот и да си замине како слободен играч. Претстојната недела ќе биде клучна за иднината на неколкумина играчи на Барса.
