Кол Палмер е практично недопирлив во Челзи, пишува „Скај спортс“. Заминување во Манчестер јунајтед за него не е опција, ниту за Сините од Лондон. Палмер има договор со клубот до 2033 година.
Откако пред две и пол години пристигна од Манчестер сити, Палмер за Челзи постигна 41 гол и забележа 19 асистенции. Поради тоа, англискиот репрезентативец стана речиси „недопирлив“ во лондонскиот тим и клубот би размислил за продажба само доколку добие исклучително висока понуда.
Сепак, како што пишуваат британските медиуми, 23-годишниот играч за врска чувствува носталгија и би ја прифатил можноста да му се приклучи на Јунајтед.
Палмер се бори и со проблематична повреда на слабините, поради која оваа сезона има одиграно само 12 натпревари во Премиер лигата. Тој ја пропушти и неделната средба во која Челзи го совлада Кристал палас.
