Екипата на Бостон селтикс поведе со 3:0 во победи против Индијана, откако утрово славеше на гостински терен со 114:111, во конференциското финале на Истокот во НБА плејофот. Делуваше неверојатно дека Бостон може да победи на гостувањето кај Индијана, посебно по заостанувањето од дури 18 поени во третата четвртина (84:66), но најдобриот тим на Истокот не се откажа и на крајот успеа да направи пресврт.
Бостон прво направи низа од 15:4 и намали на 88:81, но Индијана ја имаше контролата на резултатот до последната минута. На помалку од 90 секунди до крајот Индијана водеше со 111:106, но Бостон одигра неверојатна завршница и со серија од 8:0 стигна до победа која ги носи речиси сигурно во големото финале.
Џејсон Татум со 36 поени, 10 скока и осум асистенции беше предводник на победничкиот тим, а Џелејн Браун додаде 24 поени. Сепак инспиратор на победата беше и Холидеј кој во последната четвртина даде девет поени, а ја имаше и клучната украдена топка на пет секунди до крајот кога Индијана имаше напад за победа.
