Иван Чупиќ, еден од главните адути на Вардар, има една желба пред да го напушти Вардар, а тоа е пред полна сала да се прости од скопскиот ракометен гигант каде што игра веќе пет години.
Хрватскиот репрезентативец ги минува последните месеци во редовите на Црвено-црните бидејќи по крајот на оваа сезона, ќе се пресели во ППД Загреб.
Желбата ја откри во интервју за хрватскиот весник „Спортски новости“.
„Посакувам да се вратат навивачите на трибините за кога ќе дојде време да се каже збогум, да можам на убав начин да им се заблагорадам за сè што минавме заедно изминативе пет години. Ми недостасува енергијата од трибините која ни даваше сила. Навивачите на Вардар се мојата најдрага публика и ќе ми биде многу жал доколку не добијам прилика да се простам со нив“, истакна Чупиќ.
Искусното хрватско крило беше меѓу предводниците на Вардар во освојувањето на двете европски титули, а уште повеќе се прослави со победничкиот гол против ПСЖ во финалето од ЛШ во 2017 година.
