Доминацијата на ПСЖ во Франција непрекинато трае откако во клубот пристигна Насер Ал-Келаифи, но парижаните се во страв дека сега сè може да се распадне.
Насер Ал-Келаифи е обвинет за манипулација со гласови во 2018 година во аферата „Лагардер“. Се наведува дека оваа одлука го налутила претседателот на ПСЖ и дека поради тоа државата Катар би можела да се откаже од какво било инвестирање во Франција.
Според „РМЦ Спорт“, дури имало и закани за повлекување на инвестициите.
„Ова е чиста злоупотреба и на сите им е доста“, пишува „РМЦ Спорт“, повикувајќи се на анонимен извор.
„На 5 февруари Насер Ал-Келаифи беше обвинет за „соучество во купување гласови и нарушување на слободата на гласање“, како и за „соучество во злоупотреба на овластувања на штета на ‘Лагардер’“, потсетува „РМЦ Спорт“.
Случајот датира од 2018 година, кога имало борба за моќ во управниот одбор меѓу милијардерот Винсент Болоре и најбогатиот човек во Франција, Бернар Арно, сопственикот на компанијата за луксузна стока „ЛВМХ“.
„Арно Лагардер и неговите соработници беа обвинети дека контактирале со своите познаници, вклучително и Ал-Келаифи, кој е директор на Qatar Investment Authority (QIA). Пет дена по првото гласање, QIA го промени својот став и гласаше за резолуциите предложени од Арно Лагардер“.
Обвиненијата против Ал-Келаифи, кој е претседател на ПСЖ од 2011 година, имаат одек во Доха, каде што тој престојува веќе некое време. Се очекува ситуацијата да стане уште понепријатна бидејќи Катар се заканува со повлекување на своите инвестиции во Франција.
„Оваа правна одлука предизвика силна реакција во неговото опкружување. Според нашите информации, тоа е толку иритирачко што Катар се заканува да ги повлече своите инвестиции во Франција, вклучително ‘Беин Спортс’ и Пари Сен Жермен“.
„На Катарците им е доволно од сите овие злоупотреби. Лажни обвиненија, уцени, секојдневни критики, обвинување на други за нивната целосна неспособност, сите проблеми во Франција се нивна вина. Секогаш кога ќе се обидат да помогнат, се вели дека станува збор за ‘мека моќ’. Ова е чиста злоупотреба и на сите им е доста“, изјави извор близок до владата за „РМЦ Спорт“.
Французите потсетуваат дека покрај аферата „Лагардер“, Насер Ал-Келаифи се споменуваше и во корупциските скандали поврзани со кандидатурите на Катар за Светското првенство во атлетика во 2017 и 2019 година. Овие обвиненија конечно беа поништени во февруари 2023 година, кога беше одлучено дека француските судови немаат надлежност да подигнат обвинение против него.
Откако катарските инвеститори ја презедоа контролата, ПСЖ стана доминантен во Франција и еден од најсилните клубови во светот. Оттогаш, парижаните освоија 12 титули во Франција, иако нивната најголема желба – освојување на Лигата на шампионите – и понатаму останува неисполнета.
