Златко Далиќ беше на клупата на Хрватска кога пред четири години Коцкестите со убедливи 3:0 ја победија Аргентина. Тоа значи дека овој стратег ја знае тактиката како да се победи двократниот светски првак предводен од Лионел Меси. Пред денешниот меч, Далиќ го спомна Меси во една изјава, а според аргентинските медиуми, тоа многу го лути Лео.
„Меси не трча многу, не сака да трча по топката. Тој чека топката да му дојде и потоа ја дава целата своја енергија. Не е вклучен во дефанзивата. Не смееме да му дозволиме да ја има топката во своите нозе затоа што тогаш може да ни направи најмногу проблеми. Тој е најдобриот фудбалер во светот во изминативе 10 години“, вели Далиќ во изјавата за Меси.
Аргентинскиот сајт Кларин потсетува дека сега веќе ексселекторот на Холандија, Луис ван Хал, имал слична изјава која го вознемирила Меси.
„Тој е играч кој може да го одлучи мечот во индивидуална акција. Во полуфиналето на СП 2014 година игравме против Аргентина, а Меси не ја ни допре топката, но, за жал, ние загубивме на пенали. Сега сакаме осмазда“, беше коментарот на Ван Хал пред четвртфиналето меѓу Холандија и Аргентина.
На тој меч пред осум години, Меси имаше асистенција за голот на Молина, а потоа погоди од пенал во „рулетот“ кога Аргентина се пласира во финалето на СП во Бразил. Аргентина и во Катар ја елиминираа Холандија на Ван Хал по изведување на пенали, а вечерва останува да се види каков ќе биде исходот од мечот против Хрватска.
