Хрватска остана единствената репрезентација од Балканот да ја брани честа на Мундијалот во Катар. Коцкестите се пласираа во четвртфиналето и продолжуваат со сонот дека може да го повторат успехот од пред четири години, кога играа во финалето на СП во Русија.
Сепак, Хрватска пред себе сега ќе го има најголемиот предизвик, а тоа е дуелот против петкратниот светски првак Бразил. Селекторот Златко Далиќ верува во своите фудбалери, најавува голема борба, но е реален дека противникот има ѕвезди со кои неговиот состав не може да се пофали. Далиќ откри и зошто ги извадил Модриќ, Ковачиќ и Перишиќ од игра.
„Убаво е да се биде меѓу осумте најдобри во светот. Малку прославивме по победата над Јапонија. Кога стигна мечот во продолженија, го баравме најдоброто решение. Моравме да ја чуваме енергијата, Модриќ, Ковачиќ и Перишиќ се потрошија многу, но имавме верба во тие што ги заменија. Направивме добра тактика и не паднавме во стапицата на Јапонија во која паднаа Германија и Шпанија. Сега следува дуел со Бразил, најмоќната селекција на Мундијалот. Пред нас е голем предизвик. Бразил е фаворит, но ние не се плашиме и нема да се предадеме. Сепак, не треба да летаме во облаци затоа што кај нас нема напаѓачи коишто играат во Атлетико или Јувентус. Ние сме со напаѓачи од Динамо и Хајдук“, вели во дел од анализата хрватскиот селектор Далиќ.
