Дефанзивецот на Интер, Дензел Дамфрис, смета дека составот на Нераѕурите има квалитет да ја освои Лигата на шампионите оваа сезона. Сепак, Холанѓанецот нагласи дека е прерано да се каже дали тимот може да го надмине минатогодишниот успех и пласманот во финалето.
Интер вечерва ја започнува својата европска кампања во сезоната 2025/26 со гостување кај Ајакс во Холандија.
Расположението во таборот на Интер не е на највисоко ниво поради двата последовни порази во Серија А, прво од Удинезе, а потоа и во „Дербито на Италија“ против Јувентус.
„Изгубивме два од последните три натпревари, тоа не е стартот што го посакувавме, но имаме искуство и сакаме повторно да се претставиме добро. Лигата на шампионите е различно натпреварување и мораме силно да започнеме. Сè зависи од нас, треба да ја докажеме нашата вредност. Ако го погледнете дуелот со Јуве, примавме голови премногу лесно. Работевме на тоа и си рековме дека мора да се подобриме. Нашиот стил беше доминантен, загубивме поради детали. Имаме искуство и знаеме како да се вратиме“, изјави Дамфрис пред вечерашниот меч.
Натпреварот меѓу Ајакс и Интер се игра од 21 часот на „Јохан Кројф арената“ во Амстердам.
