Градот Кочани има дадено неколку големи имиња во спортот, а едно од нив, секако, е и кошаркарот Дарко Соколов, кој повеќе од две децении успешно игра и беше дел од најголемите успеси во историјата на македонската репрезентатива кошарка.
Како и секој нормален човек во Македонија, и Соколов го погоди трагедијата по пожарот дискотеката во Кочани, а за него болката е уште поголема затоа што е роден во тој град и лично ги познава семејствата кои останаа завиени во црно, има пријатели меѓу настраданите.
„Како роден кочанчанец, многу ме погоди веста за оваа трагедија од невидени размери, вакво нешто никогаш не се случило во историјата на Македонија. Ги знам горе-долу сите, нивните фамилии, лично познавам родители на некои од починатите. Огромна загуба, нека почиваат во мир, се надевам дека никогаш повеќе нема да се случи ваква трагедија и ова нека биде поука за општеството дека мора да се смени од корен. Прво ние луѓето да се смениме, нашите навики, да се држиме до ред и закон за да нема вакви трагедии во иднина. И на погребот отидов да ги испочитувам, се знаеме сите, мало е Кочани. Жално, трагично“, вели Соколов.
БЕШЕ ДЕЛ ОД ГЕНЕРАЦИЈАТА КОЈА ИГРАШЕ ПОЛУФИНАЛЕ НА ЕП ВО ЛИТВАНИЈА
Соколов беше дел од репрезентацијата на Македонија која играше на Евробаскетите во 2009, 2011, 2013 и 2015 година, а таа 2015 е и последната во која игравме на ЕП. Пред тоа Соколов играше на големи натпреварувања и за младинските селекции.
„Јас сум презадоволен од мојата кариера, ги фатив најубавите времиња. Имавме успеси прво во Полска 2009, кога бевме блиску до четвртфинале, потоа за ЕП во Литванија знаат сите, испишавме историја, а во 2015 дојде смената на генерации и потоа како да застана репрезентативната кошарка. Мора да се мисли на младите категории и да излегуваат деца кои ќе може да играат за репрезентација“, смета Соколов.
„Мора нешто да се смени во кошарката. Треба да се намали бројот на странци во првата лига и да им се даде шанса на помладите играчи бидејќи ќе има смена на генерации, браќата Стојановски, Бојан Крстевски, Стојан Ѓуроски веќе се во години, за две-три години ќе дојде промената и треба да се размислува во тој поглед. Треба да почнат да играат тие што имаат 17, 18, 19 години и да се намали бројот на странци, четворица се многу во моментов. Ќе треба трпение, да се почека да созреат овие млади, но мора да се создаваат играчи“, додава бекот.
УШТЕ ЕДНА СЕЗОНА КАКО ИГРАЧ, ПА ПОТОА ЌЕ РАЗМИСЛУВА ЗА НОВ ПРЕДИЗВИК
Соколов, кој играл за повеќе клубови во Македонија, а има и интернационално искуство, сезонава настапува за Гостивар.
„Имаме турбулентна сезона, составот се направи малку подоцна, можеби беше направен полош избор на странски играчи. Имавме шанси за плејоф, но многу мечеви губевме тесно, ни избегаа од раце. Можевме да се пласираме во плејофот, реално ќе беше тоа, според буџетот и ростерот што го имаме. Сега ќе играме плејаут, се надевам дека ќе обезбедиме опстанок и ќе ги оправдаме довербата на градот и клубот. Планирам да играм и следната сезона, потоа ќе размислувам што ќе правам“, објаснува Соколов, кој следниот месец ќе наполни 39 години, а има добра статистика и со своето искуство и знаењето придонесува за тимот.
СИМПАТИИ КОН ЈУВЕНТУС ПОРАДИ РОБЕРТО БАЏО
На Дарко омилен фудбалски тим му е Јувентус, па и Јуве се најде на хуманитарниот тикет, кој ако биде добитен, парите ќе завршат во родниот град на Соколов.
„Не многу, но следам фудбал. Омилен тим ми е Јувентус, така е уште од 90-тите години, најмногу поради Роберто Баџо, ми беше омилен играч. Во обложувалница имам уплаќано во минатото, најчесто сум играл на мечеви од кошаркарската Евролига, пред десетина години имам добиено 200 евра со уплата од 50 денари“, заклучува една од најпознатите „шестки“ во историјата на макбаскетот.
