Дарвин Нуњес дал зелено светло за трансфер во шампионот на Серија А, Наполи. Според информациите, Уругваецот бил импресиониран од проектот што му го презентирал лично Антонио Конте и е подготвен да се бори за стартно место со Ромелу Лукаку во тимот.
Сепак, трансферот сè уште не е финализиран. Нема договор со Ливерпул околу отштетата, при што клубот од Мерсисајд најверојатно ќе инсистира на сума над 40 милиони фунти. Дополнително треба да се прецизираат и личните услови на Нуњес со Наполи.
По три години на „Енфилд“, каде што постигна 40 гола и запиша 26 асистенции на 143 натпревари, Дарвин Нуњес повеќе не се гледа како прв избор во нападот под водство на Арне Слот. Во втората половина од сезоната 2024/25 играше со ограничена минутажа, што ја забрза логичната разделба меѓу двете страни.
Иако не беше редовен стартер, неговата статистика останува солидна, осум гола и седум асистенции во изминатата сезона, како и вкупно 21 гол на 44 настапи во Лигата на шампионите и Лига Европа.
