Ѕвездата на Пари Сен Жермен, Осман Дембеле, ја истакна важноста од психолошката стабилност пред вечерашното големо финале во Лигата на шампионите против Интер во Минхен.
„Како што реков и претходно, многу сме горди што сме дел од ова финале. Работевме напорно и успеавме да ја промениме динамиката на сезоната. Интер е физички силен тим, добро организиран во одбраната и знае како да создаде проблеми. Ќе мора да ја смириме таа бура“, изјави францускиот офанзивец на официјалната прес-конференција.
Дембеле потенцираше дека психолошката подготвеност ќе биде клучен фактор.
„Мораме да бидеме сериозни од првата до последната минута. Секоја грешка може скапо да нè чини. Во исто време, неопходно е да ги контролираме емоциите – нормално е што сите сме возбудени, но токму тоа мора да го надминеме. Цела недела си повторуваме дека треба да останеме смирени, фокусирани и да играме со насмевка. Справувањето со емоциите ќе биде еден од клучните фактори во натпреварот“, истакна еден од најголемите адути на Луис Енрике на вечерашното финале во Минхен.
