Српскиот тенисер Новак Ѓоковиќ денеска стана вториот играч во историјата кој поминал 300 недели на првото место на АТП-листата. Пред него, тоа му успеало само уште на Роџер Федерер кој е прв со 310 недели, но не уште долго. Трет на оваа вечна листа е Пит Сампрас со 286 недели како светски рекет број 1.
Ако работите одат по планот на Ѓоковиќ, тогаш на 8 март 2021 тој ќе го надмине и Федерер и ќе стане тенисер кој најдолго се задржал на првата позиција.
Новак има 12.030 поени, а втор е Рафаел Надал со 9.850. Следуваат Доминик Тим со 9.125, Данил Медведев со 8.470, Роџер Федерер со 6.630, итн. Како прв на АТП-листата, Ѓоковиќ има 87,7 отсто успешност (378 победи и 53 порази), а против топ 10 играчите има дури 78,1 процент победи. Во финалињата скорот му е 38-14.
