Попладнево од 17.45 часот на стадионот во Дизелдорф ќе се одржи ждрепката за групите на Европското првенство во ракомет, кое во јануари 2024 година ќе се игра во Германија.
Шампионатот ќе се отвори со меч токму на стадионот, кога се очекува да има над 50.000 гледачи и тоа би бил светски рекорд за посетеност на еден ракометен дуел.
На ЕП ќе игра и Македонија, па ќе ги дознаеме ривалите за групната фаза. Македонија е во третиот шешир, што значи дека нема да играме против Хрватска, Чешка, Полска, Србија, ниту со Босна и Херцеговина.
Ждрепката е полудиригирана, јасно е дека Хрватска од третиот шешир ќе игра во Манхајм, но во овој град ќе се игра уште една група во која ќе биде Шведска како прв носител, па уште има шанса да играме таму. Групите во Берлин и Минхен се отворени за Македонија и математички поголеми се шансите нашите да играат во некој од овие два големи града во Германија.
Пренос од ждрепката за територијата на Македонија е најавен на Арена спорт 2 премиум.
