Женската ракометна репрезентација на Македонија вечерва од 20:30 часот ќе игра во второто коло на Европското првенство во Унгарија. Турција е денешниот ривал на Македонија, а според квотите, ова треба да биде неизвесен дуел, на кој нашите ракометарки секако со добра игра на теренот треба да покажат дека имаат сили за победа.
Вкупно шест дуели се играат денеска на ЕП, а токму тој меѓу Македонија и Турција е означен како најнеизвесен.
Минатата година против Турција имаме играно два пати и два пати сме загубиле минимално со по еден гол разлика (31:30 и 25:24), што треба да биде мотив повеќе да покажеме дека Турчинките не се баук за нас.
Турција никогаш нема победено на Европско првенство, а Македонија безмалку 16 години чека на радост на континентален собир. Последен пат Македонија триумфирала во меч од ЕП на 11 декември 2008 година кога турнирот се играше во Македонија (Скопје и Охрид), а тогаш во рамките од втората фаза со 29:24 славевме над Белорусија.
