Од денеска, па во следните неколку дена ќе се одиграат последните две кола од квалификациите за пласман на Европското ракометно првенство во следната година. Од 2012 година, Македонија постојано е дел од големите турнири (Светско и Европско првенство), но сега постои опасност таа убава низа да биде прекината.
По четири кола, Македонија има само една победа и е на третото место на табелата зад неприкосновената Словенија, но и зад Литванија, од која загубивме на гостински терен.
Денеска Литванија е домаќин на Словенија. Гостите немаат никаков мотив да играат затоа што сигурно се први и најдобрите играчи воопшто не се во составот за овој меч. Сепак, Словенија треба да игра за реномето и да потврди дека Литванија не може никако да ги изненади.
Доколку се случи Литванија да победи, тогаш тие сигурно ќе бидат на второто место во групата, а Македонија ќе мора да брка место на континенталниот собир како третопласирана.
Македонија утре игра на гости кај Летонија и избраниците на селекторот Кирил Лазаров се големи фаворити. Во последното коло, нашата репрезентација во „Јане Сандански“ ќе биде домаќин на Литванија.
