Македонската фудбалска јавност е во исчекување на старт на една нова ера, во која ќе има нов селектор. Благоја Милевски кој нешто повеќе од четири години беше предводник на сениорската фудбалска селекција, денеска го одработи последниот ден од договорот и од утре е слободен.
Од Фудбалската федерација на Македонија досега не решија да му го продолжат договорот на Милевски, што е јасен показател дека треба да има нов селектор.
Новата работна недела во ФФМ треба да започне со седница на Управниот одбор, каде покрај другите точки, ќе се дава отчет за направеното во 2025 година на фудбласките репрезентации. Македонија втор пат во низа се пласираше во баражот за пласман на Светското првенство и тоа втор пат се случи под водство на Милевски.
Бражот за СП 2026 беше обезбеден преку Лига на нации каде Македонија заврши како прва во Ц сегментот и се избори за пласман во Б сегментот за следниот циклус од ова натпреварување. Што се однесува до квалификациите, Македонија беше трета, зад Белгија и Велс. Загуби само еднаш во осум меча и тоа во последното коло, но тоа беше дебакл со 7:1 од Велс во Кардиф.
Пред три години, во првиот бараж за СП 2022, Македонија ја победи Италија на гости со 1:0, но не успеа да го направи завршниот чекор откако загуби од Португалија на гости со 2:0.
Сега, во баражот кој ќе се игра во март 2026 година, Македонија ќе гостува во Копенхаген кај Данска, а само со победа ќе се размислува за финалето од плејофот за место на Мундијалот.
Сите најави, шпекулации, гласни размислувања се дека на местото на Милевски, ќе дојде актуелниот тренер на Вардар, Гоце Седлоски. Тој врши одлична работа во Вардар, Црвено-црните се први на табелата и се без пораз во домашните натпреварувања повеќе од девет месеци.
Остануав во следниот период, или можеби уште понеделнички да се потврдат или демантираат шпекулациите дека токму Седлоски ќе биде наследникот на Милевски.
