Најтрофејниот македонски фудбалски клуб Вардар втор пат во две сезони игра во бараж за место во Прва лига. Минатата сезона Вардар како второлигаш славеше над Скопје и се врати во елитната лига, а сега како тим кој заврши на 10 место во Прва лига ќе игра бараж со Детонит Плачковица, екипа која го освои третото место во Втора лига.
Вардар и Детонит се сретнаа два пати во сезоната 2022/23, а билансот е една победа на Црвено-црните и едно реми (2:0 и 1:1). Сепак, сега влогот е многу поголем. Кој ќе победи ќе игра во Прва лига.
Од Детонит најавуваат дека ова е ден за историја во нивниот клуб, но сепак Вардар на своја страна го има реномето, традицијата, историјата. Сепак, на крајот победникот ќе се реши на теренот, па можно е да одлучи и едно невнимание, една грешка или еден супер потег.
Капитенот на Вардар Филип Гачевски и тренерот Горазд Михајлов на последниот тренинг одржаа мотивациски говор.
Дуелот ќе се игра на стадионот „Младост“ во Струмица, а се очекува трибините да бидат исполнети затоа што е најавено присуство на голем број вардарови фанови, но секако дека и Детонит ќе има своја поддршка од трибините.
