Дерби-натпреварот меѓу Ливерпул и Манчестер јунајтед, кој треба да се одигра утре, е под ризик да биде одложен поради лоши временски услови. Националната метеоролошка служба на Велика Британија предупреди дека регионот на северна Англија утре ќе биде погоден од снежно невреме.
Се очекува интензивен снег, придружен со источен ветер. Прогнозата вели дека снежната покривка ќе биде меѓу три и седум сантиметри во поголемиот дел од теренот, додека на повисоки места со надморска височина над 150 метри може да достигне и до 15-30 сантиметри (Ливерпул се наоѓа на 70 метри надморска височина). Ова би можело да предизвика нарушувања во сообраќајот, доцнења, па дури и откажување на летови и возови. Можно е патниците да останат заглавени, а возилата напуштени на патиштата, предупредуваат службите.
Предупредувањето, кое одговара на „портокалов код“ за опасни временски услови, ќе биде во сила од 21 часот вечерва до 23:59 часот утре.
Претходно, на 7 декември, градското дерби меѓу Евертон и Ливерпул беше одложено поради слични временски услови.
