Франција важеше за фаворит на гостувањето во Сплит против Хрватска, но на крајот домаќините се радуваа на победа од 2-0. Ова беше прв меч од четвртфиналето во Лигата на нациите. Реваншот се игра в недела, во Париз.
Анте Будимир и Иван Перишиќ ги постигнаа головите за победа на Хрватска, а интересно е дека Коцкестите во првиот дел, при резултат 0-0, промашија и пенал.
Селекторот на Франција, Дидие Дешан, призна дека неговиот тим не можел да се снајде најдобро против разиграниот ривал.
„Беше многу тешко да се игра против организираната Хрватска, имавме и ситуација кога Мањан одбрани пенал, но бевме малку апатични и не бевме добри. Направивме многу технички грешки, тоа не беше поради физички проблеми туку поради лошиот пристап, но тоа беше и поради противникот кој ги казнуваше сите наши грешки. Бевме подобри во вториот дел, но заморот го зеде својот данок во таа фаза и не можевме да се вратиме“, објасни Дешан по мечот.
Селекторот на Франција сепак не се предава и се надева дека во реваншот Галските петли ќе успеат да ја анулираат оваа негатива.
„Во реваншот мора да бидеме поефикасни и да одиграме многу подобро. Уште не знам што ќе направам, но секако мора да има промени во составот и играта“, додаде предводникот на актуелниот светски вицепрвак.
