Одбојкарите на Струмица Никоб по деветти пат го кренаа пехарот за победникот во Купот на Македонија.
На завршниот турнир што се игра во Радовиш, Струмичани во финалето со 3:0 во сетови и тоа со 25:7, 25:23 и 25:18 беа подобри од ГОК Борец.
Струмичани кои беа апсолутни фаворити за трофејот, финалето го започнаа фуриозно и на притивникот му дозволија да освои само седум поени во првиот сет.
Во вториот сет имаше далеку поголема неизвесност, ГОК Борец имаше предност од 19:21, но одбојкарите на Струмица одиграа најдобро кога беше најпотребно и со серија од 6:2, го добија сетот со 25:23.
Во третиот сет, фаворитот постојано беше во предност, брзо дојде до предност од три поени (6:3) и рутински го приведе сетот до крајот за деветта титула во Купот на Македонија. Владо Милев со 12 освоени беше најдобар кај старо-новиот победник во Купот.
