Лос Анџелес клиперс триумфираше на гостувањето кај Вашингтон со 121-96 благодарение на Џејмс Харден, кој уфрли 43 поени и Ивица Зубац кој имаше 18 поени и 16 скока.
За Харден ова беше 100-ти меч во НБА-кариерата на кој постигнал 40 или повеќе поени. Троцифрен број 40-ки пред него имале само уште славните Вилт Чемберлен, Мајкл Џордан и Коби Брајант.
Екипата на Кливленд кавалирс го претрпе вториот пораз сезонава, а прв дома. Коњаниците беа поразени дома од Атланта со 124-135. Најзаслужен за победата на Хокс беше Тре Јанг со дабл-дабл од 20 поени и дури 22 асистенции, што е негов личен рекорд и овосезонски рекорд во лигата.
Далас и без тројца од своите четворица најдобри стрелци го совлада Њујорк со 129-114 благодарение на одличното прво полувреме. Од 14-те меча кои се играа рано утрово, само на еден имаше продолжение, во Филаделфија, каде што на крај се радуваа гостите од Хјустон со 122-115. Оклахома сити со победата над Голден стејт од 105-101 остана на првото место на Западот.
