Репрезентацијата на ДР Конго се израдува на првата победа во својата историја на светските ракометни првенства откако во драматичен меч со 32:31 ја победи Ангола. Ова беше меч од Претседателскиот куп на мундијалот, а Конго до победата стигна благодарение на одличната игра во второто полувреме.
Ангола на стартот поведе со 2:0 и во текот на целото прво полувреме имаше предност, најголемата беше 12:6, но по првите 30 минути се замина со 15:13. Во второто полувреме, Конго постојано притискаше и на средината од вториот дел првпат поведе (24:23), и тоа беше најава за неизвесна завршница.
Ангола поведе со 31:30, но Конго со два гола во завршницата направи пресврт и стигна до првата победа во историјата на планетарните собири. Првата ѕвезда на ДР Конго, 137 килограми тешкиот пикер Готје Мвумби одигра 16 минути и постигна два гола од три обиди, а на крајот со своите соиграчи се радуваше на големиот успех.
