Според некои најави од Шпанија, Диего Симеоне би можел да добие отказ од Атлетико Мадрид. Аргентинскиот тренер пред крајот на 2011 година беше назначен за тренер на Атлетико и веќе 15 години е на чело на мадридскиот тим.
Со Симеоне на чело, Атлетико освои две титули во шпанското првенство, оставајќи ги зад себе гигантите Барселона и Реал Мадрид. Сепак, според пишувањата на шпански „Спорт“, можно е Симеоне да си замине од клупата и тоа поради затегнатите односи со новиот спортски директор во клубот, Матео Алемани. Актуелниот договор на Симеоне со Атлетико е до јуни 2027 година.
Атлетико синоќа убедливо со 5:0 победи на гости кај Бетис и се пласираше во полуфиналето на Купот на Шпанија. Во првенството на Шпанија, Атлетико е на третото место на табелата со 10 бодови помалку од лидерот Барселона, а денет помалку од Реал Мадрид.
Во Лига на шампиони, Атлетико неочекувано дома загуби од Бодо/Глимт и поради тоа испадна од Топ 8 екипите, па ќе мора да игра во шеснаесетфиналето од елитната лига на УЕФА.
Освен титулите во шпанското првенство, Симеоне два пати ја освои и Лига на Европа, Купот на Шпанија, Суперкупот на Шпанија, како и две титули во Суперкупот на УЕФА. Два пати играше и во финалето на Лига на шампиони.
Симеоне четири пати беше прогласуван за најдобар тренер во Шпанија. Со Атлетико има 772 меча и биланс од 457 победи, 166 нерешени и 149 порази.
