Голманот на македонската репрезентација, Столе Димитриевски, ќе треба да ја потврди одличната форма од Ла Лига и тој ќе биде еден од клучните адути за успеси во октомврискиот циклус квалификации на дуелите против Лихтенштајн и Германија.
Прво ќе гостуваме во Вадуз, кај фенерџијата и тотален аутсајдер Лихтенштајн, на 8 октомври, а потоа следува нов мегадуел со Германците, овојпат во Скопје на 11 октомври.
Ова се двата клучни натпревари на кои Македонија мора да освои најмалку четири бода ако сака да остане во конкуренција за настап на Мундијалот во Катар идната година.
„Мислам дека првиот натпревар против Лихтенштајн е најважниот за нас. Фаворити сме, треба да го добиеме тој меч, но ќе биде многу тешко затоа што Лихтенштајн е добра репрезентација. Видовме дека против Ерменија одиграа одличен натпревар и остварија позитивен резултат, 1:1 на гостински терен. Квалитетно ѝ се спротивставија и на Германија. Фаворитот во нашата група ја осигури победата во последните 20-тина минути.
Треба да бидеме фокусирани во текот на сите 90 минути за да дојдеме до победа. Мораме да одиграме сериозен натпревар, да бидеме цврсти на сите делови од теренот и, секако, внимателни во дефанзивниот ред за да останеме без примен гол. Се разбира, и да реализираме некоја од шансите за погодок, што мислам дека секако ќе ги направиме“, вели Димитриевски.
Во Ла Лига Димитриевски е еден од најдобрите голмани на стартот од првенството, а формата ќе мора да ја потврди и во репрезентацијата, особено на мечот со Германците на 11 октомври во Скопје.
Под палката на новиот селектор Ханси Флик, популарните Панцери редат само победи и се први во групата, а ќе дојдат во Скопје за да се реваншираат за сензационалниот пораз од 1:2 во март годинава против Македонија.
„Со Германија е многу поатрактивен натпреварот за сите нас, но треба да останеме фокусирани на првиот меч против Лихтенштајн. Победивме на гости против Германија, сакаме да се надигруваме на тоа ниво, но сега ќе биде сосема поинаку. Повторно ќе кажам, најважно за нас е најпрвин да оствариме позитивен резултат во Вадуз, а тоа за нас е победа“, додаде стандардниот голман на Македонија.
Подготовките за двата меча против Лихтенштајн и Ерменија, македонската репрезентација ќе ги започне на 4 октомври.
