Димитриевски за „Флешскор“: СП би било врвот на мојата кариера, нема да биде изненадување ако победиме!

И во 2022 година Македонија беше во иста ситуација, доби шанса преку баражи да се најде на СП. Тогаш бевме запрени во финалето од Португалија, откако во полуфиналето ја шокиравме Италија. Сега полуфинален ривал ни е Данска. 

„Натпреварот против Португалија беше еден од најважните во историјата на националниот тим, а сега имаме уште една можност да испишеме историја и треба да ја искористиме таа шанса со двете раце и конечно да го оставиме тој пораз од Португалија зад нас. Овој меч со Данска веројатно е еден од најважните натпревари во нашите кариери и мора да излеземе таму како вистински мажи за да го играме нашиот најдобар фудбал, да го спроведеме тактичкиот план на селекторот и да победиме. Имаме квалитет, не мислам дека е фер да зборуваме за „изненадување“ ако победиме. Ние сме многу добар тим“, смета Столе.

На изјавата на Расмус Хојлунд дека „сè уште не резервирал летен одмор“ бидејќи верува дека ќе игра на СП, Димитриевски одговара: „И јас не сум резервирал патување за медениот месец“.

Столе верува дека летово ќе биде зафатен со настап на Мундијалот, а патувањето со сопругата малку ќе почека.

„Обезбедувањето место на СП дефинитивно би бил врвот на мојата кариера, без сомнение. Неописливо е чувството да играм за репрезентацијата на Македонија. Јас сум натпреварувачки настроен човек по природа и секогаш сакам да играм, а да го доживеам тоа чувство во над 80 различни прилики е исто така голема гордост за мене“, заклучува Димитриевски.

Столе проговори и за неговиот статус во клубот Валенсија.

„И јас и клубот сме целосно фокусирани на претстојните натпревари со цел да завршиме што е можно повисоко во Ла Лига, но дефинитивно наскоро ќе има преговори и се надевам дека ќе дојдеме до договор што ќе им одговара на двете страни“, вели Димитриевски, на кој најголем идол му е Џанлуиџи Буфон, а во моментов Тибо Куртоа го смета за најдобар голман.