ПСВ Ајндховен синоќа се промовираше во последниот осминафиналист во Лигата на шампиони откако со 3:1 славеше над Јувентус. По 90 минути игра беше 2:1 за холандскиот тим, резултат со кој Јувентус славеше на првиот меч во Торино, па мораше да се играат дополнителни 30 минути.
Во продолжението, ПСВ постигна и трет гол за вкупна победа од 4:3 против италијанскиот гигант. Еден од хероите на тимот од Ајндховен е хрватскиот репрезентативец Иван Перишиќ.
Токму Перишиќ го постигна голот на гости во Торино, а синоќа даде гол и за водство на ПСВ од 1:0. Со овие два погодоци, Перишиќ се запиша во историјата на Лигата на шампионите. Со 36 години и 17 дена, Хрватот е најстариот фудбалер кој успеал да постигне гол во два меча по ред во нокаут-фазата од ЛШ.
Интересно е дека Перишиќ само до пред пет месеци играше во Хајдук и беше соиграч на Александар Трајковски, а воопшто не беше во плановите да биде дел од елитното друштво на УЕФА. Во септември ветеранот потпиша за ПСВ и тој потег се покажа како одлично решение на холандскиот тим затоа што токму Перишиќ е творецот за елиминацијата на Јувентус.
