Пол Погба ќе биде дел од тимот на Манчестер јунајтед на турнејата во Австралија, Сингапур и Кина, но тоа не значи со сигурност дека останува член на „црвените ѓаволи“ во целата наредна сезона.
Французинот доби совет од Реал Мадрид да не ја отежнува ситуацијата со терање инает, и да не ги лути во Јунајтед, туку да чека, бидејќи го увериле оти ќе ја завршат работата околу трансферот. Манчестер веројатно ќе ја прифати понудата на Реал од 80 милиони евра плус Иско, и парите ќе ги искористи за да го купи Хари Мегваер или Матајс Де Лихт, бидејќи приоритет им е дефанзивец.
Погба не тренираше со својот клуб, туку беше во САД, поточно во Њујорк, а како изгледаа неговите подготовки, 26-годишниот француски репрезентативец покажа на социјалните мрежи. Погба трчаше низ познатиот Централ парк во Њујорк и го привлекуваше вниманието на случајните минувачи кои џогираа покрај него или седеа на клупите.
Манчестер јунајтед на 26 јули ќе се врати во Англија. Првата контрола им е на 13 јули со Перт глори, па на 17 јули со Лидс јунајтед, потоа заминуваат за Сингапур за меч со Интер на 20 јули, а последниот пријателски дуел е на 25 јули со Тотенхем во Шангај.
