Поранешниот селектор на француската репрезентација, Рајмон Доменек, ја критикуваше фудбалската репрезентација на Англија, велејќи дека тие немаат никакви шанси да се надеваат дека може да стигнат до титулата на Светското првенство кое летово ќе се игра во САД, Канада и Мексико.
Според составот на играчите кои ги има, но и добрите резултати во последно време, Англија, според букмејкерите, но и според дел од аналитичарите, се најавува дека може да биде еден од главните фаворити за освојување на трофејот. Сепак, со тоа не се согласува Доменек.
На прашањето дали Англија е меѓу таа елитна група потенцијални шампиони, Доменек беше нештедлив во својата проценка, нагласувајќи дека тежината на историските неуспеси сè уште тежи врз националниот тим, без оглед на талентот што му е на располагање на Тухел.
„Англичаните не се меѓу фаворитите. Сите се согласуваме дека е така, нели? Тие имаат создадено таква слика на „губитинци“, што никој повеќе не ги сфаќа сериозно. Тоа е ужасно“, рече 74-годишниот француски тренер и некогашен предводник на Галските петли.
Во речиси стогодишната историја на Мундијалите, Англија има само една титула, и тоа таа во 1966 година, кога до пехарот стигнаа на домашно тло. Тоа е и единствениот трофеј од големите натпреварувања за Англија затоа што Гордиот албион уште никогаш не бил европски првак.
