Ѕвездата на Далас маверикс, Лука Дончиќ, кој на последните два меча против ЛА лејкерс и Хјустон постигна 82 поени, утринава во дуелот со Њујорк никс отиде чекор подалеку. Во победата на Далас од 126:121, Дончиќ оствари трипл-дабл од 61 поен, 21 скок и 10 асистенции. Словенецот е прв играч во историјата на НБА кој остварил трипл-дабл со 60 поени и 20 скокови. Ова исто така беше 53-ти трипл-дабл во неговата кариера.
Тој на две секунди до крајот на регуларниот дел, во моментите кога Њујорк имаше два поени предност, го промаши второто слободно, ја фати одбиената топка и се избори за продолжение од пет минути, во кое неговиот тим беше подобар и дојде до триумфот.
Одлична партија одигра и Никола Јокиќ во победата на неговиот Денвер од 113:106 над Сакраменто кингс. Центарот мечот го заврши со 20 поени, девет скока и 11 асистенции и е најзаслужен за победата на неговиот тим, кој ја задржа лидерската позиција во Западната конференција.
Леброн Џејмс со 28 постигнати поени го предводеше ЛА лејкерс до победа од 129:110 над Орландо, со која е прекината серијата од четири порази по ред на Езерцата.
Џејлен Браун со 39 и Џејсон Тејтум со 38 поени се најзаслужни за победата на Бостон од 126:102 над Хјустон, со која Бостон остана лидер на Истокот.
Резултати: Орландо – ЛА лејкерс 110:129, Вашингтон – Филаделфија 116:111, Бостон – Хјустон 126:102, Индијана – Атланта 129:114, Торонто – ЛА клиперс 113:124, Мемфис – Феникс 108:125, Оклахома сити – Сан Антонио 130:114, Далас – Њујорк 126:121, Голден стејт – Шарлот 110:105, Сакраменто – Денвер 106;113.
