Бостон селтикс го победи Далас маверикс со 105-98 во вториот домашен натпревар од финалето во НБА-лигата и поведе со 2-0 во серијата која се игра до четири победи.
Херој на важниот триумф на Бостон Селтикс е Џру Холидеј. Тој постигна 26 поени со одличен процент на шут од поле (11/14) и 11 скока, а додаде и три асистенции, по една украдена топка и по една блокада. Сето ова го одработи без ниту една загубена топка.
Џејлен Браун постигна 21 поен со седум асистенции. Џејсон Тејтум беше стрелец на 18 поени со лош процент на шутот (6/22 од поле и 1/7 за тројки), но надомести со 12 асистенции и девет скока. Дерик Вајт исто така придонесе во клучните моменти со 18 поени, пет скока и три украдени топки. Кристапс Порзингис успеа да помогне со 12 поени за 23 минути на теренот.
Сето ова отсликува дека Бостон селтикс повторно победија со тимска игра.
Од друга страна, Далас беше шоу на еден човек. Лука Дончиќ одигра одлично, иако очигледно е повреден. Покрај веќе старите повреди на десното колено и на левиот скочен зглоб, тој сега играше и со контузија на градниот кош.
Постигна 32 поена (12/21 од поле) со 11 скока и асистенции, додавајќи и четири украдени топки. Тој стана првиот играч на Далас кој постигнал трипл-дабл во финалето. Воедно стана и најмладиот (25) играч во историјата на најсилната лига кој остварил трипл-дабл со 30 поени во финалето.
Сепак, Дончиќ имаше и осум загубени топки и четири нереализирани слободни фрлања. Тој исто така не погоди тројка на 28 секунди до крајот, со што ја загуби и последната шанса на Далас да се врати во мечот. Но, јасно е дека и овојпат ја немаше поддршката од соиграчите за неговиот тим да стигне до прв триумф.
Кајри Ирвинг, кој повторно навлече гнев од публиката во Бостон затоа што ненадејно ги напушти Селтикс пред пет години, го загуби 12-тиот натпревар по ред против својот поранешен клуб. Постигна само 16 поени со шут (7/18 шут) и ги промаши трите тројки. Пи Џеј Вашингтон беше единствениот од останатите кој имаше значаен придонес со 17 поени и седум скока.
Следните два натпревари од финалната серија се играат во Далас.
