Диего Коста го одигра последниот меч за Атлетико Мадрид против Барселона, барем според информацијата што ја објави „Ел Мундо Депортиво“.
Исклучувањето на дербито со Каталонците ја прели чашата кај раководството на Атлетико и одлуката е Коста да оди на продажба ова лето.
Иако тренерот Диего Симеоне се спротивставува на ваквата одлука и најави дека сериозно смета на 30-годишниот напаѓач и за следната сезона, сепак ќе има разделба.
Атлетико го плати Коста 55 милиони евра при трансферот од Челси, а платата му е нето 10 милиони евра по сезона. Тоа ќе биде најголемиот проблем за популарните „јорганџии“, кои имаат договор со поранешниот шпански репрезентативец до 2021 година.
Коста и долго време беше повреден, не игра на препознатливо ниво и тешко ќе најде клуб што ќе ги задоволи неговите услови и ќе му ја плаќа сегашната плата што ја има во Атлетико.
