Репрезентацијата на Бразил со пресврт ја совлада Русија со 3:2 во сетови, по 2 часа и 16 минути жестока борба во топ-6 фазата на Светското првенство за мажи во одбојка.
Русите делуваа разиграно во првите два сета, кои ги добија со 25-20 и 25-21, потоа Бразил влезе во посакуваниот ритам и во третиот сет врати со 25-22. И четвртиот сет беше неизвесен, но и тој им припадна на „кариоките“ со 25-23, па тај-брејкот одлучуваше за тоа кој ќе биде победник и ќе направи чекор кон полуфиналето.
Во петтиот сет, Бразил имаше константно водство и на крајот славеше со 15-13, за радост на нивните фанови во салата во Торино.
Утре, Русите играат против САД, а Бразилците ќе се одморат и задутре ќе играат против засега непоразените Американци, по што ќе се знае кои две селекции од оваа група ќе одат во полуфиналето. Вечерва, во рамките на другата група, играат Италија и Србија, а слободна е Полска.
