Фудбалерите на Макаби Хаифа синоќа го одиграа првиот натпревар од започнувањето на воениот судир помеѓу Израел и Палестина. Мечот се играше на неутрален терен, во кипарскиот град Ларнака. Пред натпреварот беше предвидено да им се оддаде почит на сите жртви во воените судири, но официјалниот спикер на разгласот најави минута молк само за израелските жртви. Тоа ги налути двајцата фудбалери на Виљареал, кои се повлекоа од теренот и заминаа на клупата, а подоцна се вратија на теренот за да го одиграат натпреварот.
Се работи за Французинот со алжирско потекло, Аиса Манди, и Шпанецот со марокански корени, Илиас Ахомах.
На трибините во Ларнака беа поставени 1.400 сино-бели балони, кои го симболизираат бројот на жртвите во терористичкиот напад на Хамас, што беше и иницијалната каписла за почетокот на војната.
„Нивното однесување е срамно и неприфатливо. Сите видоа за какви луѓе се работи“, кусо прокоментира портпаролот на Макаби по натпреварот.
На крајот Виљареал се радуваше на победата со 2-1.
